කර්මාන්ත ශාලා සේවකයන්ට එලව එලවා පහර දෙයි - ක්‍රියාමාර්ගයක් නොගන්නේ සංහිදියාවට හානියක් සිදුවන නිසාලු
ලංකා ඛනිජ වැලි සංස්ථාව පුල්මුඩේ කර්මාන්ත ශාලාව ආසන්නයේ වැලි ගොඩවල් ආරක්ෂා කිරීම සඳහා ගිය ඛනිජවැලි සංස්ථාවේ සේවකයන් පිරිසකට ප්‍රරදේශවාසීන් පිරිසක් පොලු මුගුරු වලින් අතින් පයින් එළව එළවා පහර දී සේවකයන්ට බරපතළ තුවාල සිදු කොට ඇතිබව ඛනිජ වැලි සංස්ථාව සේවකයෝ පොලීසියට පැමිණිලි කොට තිබේ.
මේ වන විට තුවාල ලැබූ එක් සේවකයකු රෝහල්ගත කොට තිබෙන බවත් ප්‍රදේශයේ දේශපාලන බලපෑම් මත ඛනිජ වැලි සංස්ථා සේවකයන්ට නිරන්තරයෙන් මේ ආකාරයෙන් පහරදීම් සිදුකරන බව කියති. එහෙත් මෙතෙක් බලධාරීන් හෝ නීතිය ක්‍රියාත්මක නොවීම නිසා ලංකා ඛනිජ වැලි සංස්ථාවට අයත් පුල්මුඩේ කර්මාන්ත ශාලාවේ සේවකයෝ දැඩි අසීරුතාවකට පත්ව සිටින බව එහි සේවකයෝ පවසති. ලංකා ඛනිජ වැලි සංස්ථාව කර්මාන්ත අමාත්‍යාංශයට අයත් ආයතනයකි.
අමාත්‍ය රිෂාඩ් බදුර්දීන් මහතාගේ සහ අමාත්‍ය රවුෆ් හකීම් මහතාගේ කණ්ඩායම් දෙකක් අතර ඇති අර්බුදකාරී තත්වය නිසා මෙම සේවකයන්ට පහර කෑමට ලක්වන බවත් එහි සේවකයෝ පවසති. පසුගියදා ලංකා ඛනිජ වැලි සංස්ථාවේ සභාපතිනි නීතිඥ ඉන්දිකා රණතුංග මහත්මිය ඇතුළු කණ්ඩායමක් පුල්මුඩේ කර්මාන්තශාලාව ප්‍රදේශයේ නිරීක්ෂණයට එක් වූ බවද විශාල වශයෙන් අවට ජනතාව දිවා රාත්‍රී සිය බලය දේශපාලන බලය පෙන්වමින් ඛනිජ වැලි සංස්ථාවට අයත් වටිනා වැලි රැගෙන යාම සිදු කෙරෙන බව එම වැලි නිධි ආරක්ෂා කිරීම සහ එම භූමිය වටකොට වැට ගැසීම සඳහා යා බැලීමට ගිය අවස්ථාවේදී පොලු මුගුරු රැගෙන පරුෂවචන පවසමින් නිලධාරීන්ට සභාපතිවරිය ඉදිරියේම ගම්මුන් පහරදුන් බව නියෝජ්‍ය සාමාන්‍ය අධිකාරි ටී .එම් .පී. කේ .මුණසිංහ මහතා පැවසීය.
මෙම ගැටුම සහ පහරදෙන අවස්ථාවේ ඒ අසල සිටි පුද්ගලයකු තම සිය ජංගම දුරකතනයෙන් සිද්දිය පටිගත කොට තිබිණි. මෙම ගැටුම පිළිබඳව මෙතෙක් නිසි පරීක්ෂණයක් සිදු නොවන බවත් මෙවැනි සිද්ධීන් ජනමාධ්‍ය පවා පළ වීමට ඇති අවස්ථාවන් පවා එම ප්‍රදේශවාසින් විසින් අසුරා තිබෙන බවත් දේශපාලන බලය පදනම් කරගෙන ලංකා ඛනිජ වැලි සංස්ථාවට අයත් ඉතා වටිනා වැලි සම්පත් දිවා රාත්‍රියෙහි ටිපර් රථ බැකෝ යන්ත්‍ර යොදා ගෙන රැගෙන යෑම සිදු කරන බවද එහි සේවකයෝ පවසති .
එම අවස්ථාව නවතා දැමීම සඳහා නිලධාරීන් උත්සාහ ගනිද්දී දේශපාලන බලධාරීන්ගේ මැර කණ්ඩායම් යොදා රාජ්‍ය ආයතනයට පැමිණ පොලු මුගුරුවලින් පහරදීම් සිදු කරන බවද ඔවුහු පවසති. මේ පිළිබඳව ඉහළ බලධාරීන්ට දැනුම් දුන්න ද කිසිදු ක්‍රියාමාර්ගයක් නොගන්නේ සංහිදියාවට හානියක් සිදුවන බව පවසමින් බව ලංකා ඛනිජ වැලි සංස්ථා සේවකයෝ කියා සිටිති.
(දඹුල්ල කාංචන කුමාර ආරියදාස)
No comments: