සෞඛ්‍ය අමාත්‍යාංශයේ දුෂණ වංචා පිළිබද පරීක්ෂණ - ඇමැති රාජිත වාර්තාවක් ඉල්ලයි
සෞඛ්‍ය අමාත්‍යාංශය මගින් ආරම්භ කර ඇති සංවර්ධන ව්‍යාපෘති 104 ක සහ විදේශ ආයෝජන ව්‍යාපෘති 78 ක ප්‍රගතිය පිළිබදව කඩිනම් වාර්තාවක් ලබාදෙන ලෙස සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා නිලධාරීන්ට උපදෙස් ලබාදී තිබේ.
පසුගිය මාස 02 ක කාලය තුල මෙම ව්‍යාපෘති ක්‍රියාත්මක නොවීම පිළිබදව ලැබුණු පැමිණිලි සැළකිල්ලට ගනිමින් අමාත්‍යවරයා මෙම උපදෙස් ලබාදී තිබේ. එම ව්‍යාපෘති කඩිනමින් අවසන් කළ යුතු බව ද අමාත්‍යවරයා පෙන්වා දී ඇත.
නාරාහේන්පිට රුධිර පාරවිලයන මධ්‍යස්ථානයේ පසුගියදා පැවැති රෝහල් අධ්‍යක්ෂවරුන්ගේ රැස්වීමක දී සෞඛ්‍ය අමාත්‍යවරයා මේ බව ප්‍රකාශ කළේය. තව ද 2019 වර්ෂය සදහා රෝහල් වලට අවශ්‍ය මානව සම්පත, ගොඩනැගිලි සහ වෛද්‍ය උපකරණ පිළිබද වාර්තාවක් කඩිනමින් ලබාදෙන ලෙස සෞඛ්‍ය අමාත්‍යවරයා පළාත් සෞඛ්‍ය සේවා අධ්‍යක්ෂවරුන්ට, ප්‍රාදේශීය සෞඛ්‍ය සේවා අධ්‍යක්ෂවරුන්ට සහ රෝහල් අධ්‍යක්ෂවරුන්ට මෙහිදී දැනුම් දෙන ලදි.
මේ අතර සෞඛ්‍ය අමාත්‍යාංශයේ විමර්ශණ ඒකකය ඉදිරියට කළ යුතු රාජකාරිමය කටයුතු පිළිබදව ද අමාත්‍යවරයා උපදෙස් ලබාදුන් අතර, විමර්ශණ ඒකකය “බිල්ලෙක්” නොවන බව ද අවධාරණය කර සිටියේය. සෞඛ්‍ය සේවකයින් රාජකාරි වේලාවේ දී පෞද්ගලික රෝහල් වල සේවය කිරිම සහ සෞඛ්‍ය අමාත්‍යාංශයේ දුෂණ වංචා පිළිබද පරීක්ෂණ පවත්වන ලෙස ද අමාත්‍යවරයා විමර්ශණ ඒකකයට උපදෙස් ලබා දුන්නේය. රෝහල්වල ගොඩගැසී ඇති සායනික අපද්‍රව්‍ය කඩිනමින් ඉවත් කිරිම පිළිබදව ද මෙහිදී සාකච්ඡා කෙරුනි.
No comments: