දෙමළ ජාතික සන්ධානය රජයට සහය දැක්වීම නතර කරයි?

රජය විසින් ජාත්‍යන්තරය හමුවේ දෙමළ ජාතික සන්ධානය රැවටීම පමණක් නොව හෑල්ලුවට ලක් කිරීමද සිදුකරණ නිසා වහාම දෙමළ ජාතික සන්ධානය රජයට සහය දැක්වීම නතර කළ යුතුව ඇතැයි උතුරු පළාත් සභාවේ හිටපු ඇමතිනී ආනන්දි සෂිහරන් මහත්මිය පවසයි.

ඇය යාපනයේදී මාධ්‍යවේදීන්ට අදහස් දක්වමින් කියා සිටියේ ජිනීවා මානව හිමිකම් මණ්ඩලයේදී රජයේ නියෝජිත පිරිස දෙමළ ජාතික සන්ධානයේ සියලුම බලාපොරොත්තු කඩ කොට ඇති බවයි.

රජය දෙමළ ජාතික සන්ධානයට වූ පොරොන්දු ඉටුවීමක් හෝ මානව හිමිකම් මණ්ඩලයට වූ පොරොන්දු ඉටුවීමක් ගත වූ වසර තුන ඇතුළතදී සිදුව නොමැති හෙයින් දෙමළ ජාතික සන්ධානය මේ අවස්ථාවේදී රජයට අනුග්‍රහය දැක්වීමේ සියලුම ක්‍රියාවන්ගෙන් ඉවත් විය යුතුව ඇතැයිද පැවසීය.

ජිනීවා මානව හිමිකම් මණ්ඩලයේ සැසිවාර අවසන් වී දෙමළ ජාතික සන්ධානයේ පිරිස දිවයිනට පැමිණීමෙන් පසුව තමන් මේ පිළිබදව ඔවුන්ට ලිඛිතව දැණුම් දීමක් කරණ බවද ආනන්දි සශිහරන් මහත්මිය කියා සිටියාය.

දෙමළ ජාතික සන්ධානය රජයේ අයවැයට සහය දෙන බවට මාධ්‍ය ඔස්සේ තොරතුරු පලවෙමින් පවතින බව කී ඇය මේ තත්ත්වය දෙමළ ජාතික සන්ධානයේ නිවටභාවය යැයිද කියා සිටියාය.

දෙමළ ජාතික සන්ධානයට රජය වීස්න් ඉටුකරණ බවට පොරොන්දු වූ කිසිම පොරොන්දුවක් මෙතෙක් ඉටුකොට නොතිබියදී තවදුරටත් රජය පසුපස යාම නතර කොට දෙමළ ජනතාවගේ අයිතිවාසිකම් ආරක්ෂා කරගැනීම සදහා කටයුතු කරණ මෙන් තමන් ලිඛිතවම දෙමළ ජාතික සන්ධානයෙන් ඉල්ලා සිටින බවද හිටපු අමාත්‍යවරිය පැවසුවාය.

(දිනසේන රතුගමගේ)