“සිංහල රාවය“ රාජිතව අගයයි
පෙරහැර සදහා අවශ්‍ය හීලෑ අලි ඇතුන්ගේ හිඟය පිළිබද ගැටලුව ජනාධිපතිවරයා විසින් කඩිනමින් විසදනු ඇතැයි තමන් බලාපොරොත්තු වන බව සෞඛ්‍ය පෝෂණ හා දේශිය වෛද්‍ය අමාත්‍ය දොස්තර රාජිත සේනාරත්න මහතා ප්‍රකාශ කරයි.
කළුතර බිනර මහා පෙරහැරේ කරඩුව තැන්පත් කිරිම අමාත්‍ය දොස්තර රාජිත සේනාරත්න ප්‍රධානත්වයෙන් ඊයේ (15) රාත්‍රියේ සිදු කෙරිනි. සිංහල රාවය සංවිධානයේ මහලේකම් සහ විහාරාධිපති පූඡ්‍ය මාගල්කන්දේ සුදත්ත හිමියන්ගේ උපදෙස් මත මෙම පෙරහැර පැවැත්විනි.
මෙහිදී වැඩිදුරටත් අදහස් දැක් වූ සෞඛ්‍ය අමාත්‍යවරයා - “රජ සමය මෙන් ඉංග්‍රීසීන්ගේ පාලන සමයේ දී ද දළදා පෙරහැර සදහා සහයෝගය ලබාදුන්නා. දළදා පෙරහැරට මෙන්ම අනෙකුත් පෙරහැර සදහා හීලෑ අලි ඇතුන්ගේ ප්‍රශ්නය ගැටලුවක් වී තිබෙනවා. මේ පිළිබදව අපි දීර්ඝ ලෙස සාකච්ඡා කළා. සංස්කෘතික දායාදයන් ඉදිරියට ගෙනයාම සදහා හීලෑ අලි ඇතුන් අවශ්‍ය බව පෙරහැර සංවිධායකයින් පෙන්වා දෙනවා. නමුත් පරිසරවේදීන් සදහන් කරන්නේ වනාන්තරයේ සිටින අලි ඇතුන් ගාල්කර තැබීම වරදක් බවයි. පසුගිය රජය සමයේ දී අලි ඇතුන් ජාවාරමක් බවට ක්‍රියාත්මක වුනා. එම ජාවාරමට සම්බන්ධ අලි ඇතුන් 35 ක් මේ වනවිට වනජීවි දෙපාර්තමේන්තුව භාරයේ සිටිනවා. එම අලි ඇතුන් සදහා ලබාගෙන ඇති බලපත්‍ර අක්‍රමවත්. වරදාන වරප්‍රසාද දීලා තමයි බලපත්‍ර ලබාගෙන තිබෙන්නේ. වනාන්තර වලින් හොරකම් කළ අලි ඇතුන් ද ඒ අතර සිටිනවා. හොරණ ප්‍රදේශයේ වෙළෙද ව්‍යාපාරිකයෙකු සතු අලි පැටවෙකු ද මෙලෙස වනජීවී භාරයේ සිටිනවා. එම අලි පැටවා පිළිබදව ද සොයා බැලූ විට අනාවරණය වුයේ බලපත්‍රය ලබාගැනීම අක්‍රමවත්ව සිදු වී ඇති බවයි. මෙම ප්‍රශ්නය විසදිය යුතුයි.”
සිංහල රාවය සංවිධානයේ මහලේකම් පූජ්‍ය මාගල්කන්දේ සුදත්ත හිමි -
“කළුතර බිනර මහා පෙරහැර සංවිධානය කිරිම සදහා සෞඛ්‍ය අමාත්‍ය රාජිත සේනාරත්න මහතාගෙන් පූර්ණ අනුග්‍රහය හිමි වුනා. සෞඛ්‍ය අමාත්‍යවරයාගේ සහයෝගය නොමැති නම් මෙම පෙරහැර කිරීමට නොහැකි බව මම මෙතන දී ප්‍රකාශ කරනවා. මුල්‍යමය ප්‍රශ්න, අනෙකුත් පහසුකම් සියල්ල සම්පාදනය කර දුන්නා. රාජ්‍ය නිලධාරින් සම්බන්ධ කර දෙමින් සහයෝගය ලබාදුන්නා. මගේ ඉල්ලීම් වලට බැහැ කිවුවේ නැහැ. එම නිසා දායකයින් පිරිසක් සුදානම් වුනා කළුතර නගර මධ්‍ය යේ තොරණක් ඉදි කිරීමට. එහි එක පැත්තක රාජිත ඇමැතිතුමාගේ ඡායාරූපයත්, අනෙක් පැත්තේ මගේ ඡායාරූපයත් සවිකර තිබුනා. ඒකට ඇතැම් අයට රිදිලා. දේශපාලනය සහ ආගමික වැඩසටහන් පටලවගන්න එපා. මෙම වේදිකාවෙත් සියලුම පක්ෂ වල මන්ත්‍රීවරුන් ඉන්නවා.”
“මම පෙරහැර සංස්කෘතිය සදහා අවශ්‍ය හීලෑ අලි ඇතුන්ගේ ගැටලුව පිළිබදව කරුණු ඉදිරිපත් කිරීමට සුදානම්. දැනට හීලෑ අලි ඇතුන් 38 ක් රජය භාරයේ සිටිනවා. ඉන් 35 කට බලපත්‍ර තිබෙනවා. සෞඛ්‍ය අමාත්‍යවරයා මැදිහත් වී අමාත්‍ය මණ්ඩල සංදේශයක් හෝ ඉදිරිපත් කර මෙම බලපත්‍ර සහිත අලි ඇතුන් නිදහස් කර පෙරහැර සංස්කෘතියට ලබාදිය යුතුයි. එලෙස ලබාගත් අලි ඇතුන් මම සොලොස්මස්ථානය වැද පුදා ගැනීමට පවා රැගෙන යනවා. මෙම පිංකම සිදු කිරීමෙන් ජාති ජාතිත් පිං සිද්ධ වෙනවා. දැනට පෙරහැර සංස්කෘතිය සදහා හීලෑ අලි ඇතුන් සිටින්නේ 100 ක් පමණයි.” ඒ හිමියෝ වැඩිදුරටත් පැවසූහ.
No comments: